Hai dous elementos que definen Detroit: os automóbiles e a música. Os primeiros fixeron que a cidade máis grande do estado de Michigan fose coñecida como Motor City pola localización das fábricas das principais marcas de coches de Estados Unidos. Durante os seus anos de esplendor foi unha urbe orgullosa, obreira e próspera, espello no que se querían mirar outras grandes áreas industrializadas. Ata que chegou a crise do sector do automóbil e con ela o paro, a desestruturación social e o despoboamento.

De superar holgadamente o millón de habitantes nos anos sesenta do século pasado, Detroit hoxe apenas alcanza os 700.000 e ten unha das maiores taxas de desemprego, delincuencia e analfabetismo do país. É o mellor exemplo do tan efémero como publicitado soño americano. Sen o outro elemento, a música, sería tamén imposible entender esta cidade. Nela naceu a Motown, creadora dun son único, despuntaron despois os Stooges de Iggy Pop, desde alí partiu tamén o rap furioso de Enimem, e en Detroit iniciáronse algúns dos pioneiros da música electrónica con Juan Atkins á cabeza. A explicación que o propio Atkins daba ao fenómeno do nacemento da música electrónica na súa cidade era ben prosaica: “Detroit pode ser realmente aburrido ás veces, así que para pasar o intre e para saír diso tes que atopar cousas que facer”. E alí foi tamén onde John Acquaviva, un canadense de orixe italiana (1963), coñeceu a Richie Hawtin (canadense,1970); xuntos crearían Definitive Recordings e axudarían apoiándose nas novas tecnoloxías a que os sons electrónicos convertésense no fenómeno global que son hoxe.
 
Acquaviva tivo claro desde o comezo dos 2000 que a música necesitaba novos elementos para evolucionar na súa creación, reprodución e distribución. Xunto co seu socio impulsou Final Scratch, un dispositivo que permitía aos DJ picar arquivos dixitais coma se estivesen a manipular os tradicionais pratos e vinilos analóxicos. Esta achega permitiu que a cultura de clubs e os DJ entrasen no século XXI de forma definitiva. Tamén xuntos abrireron o sitio web Beatport.com, un espazo desde que o os creadores poden compartir música electrónica a través de Internet e que segue tendo relevancia mundial. Estes avances pioneiros no seu día son, para Acquaviva, a demostración de que este estilo está máis vivo que nunca e que vai continuar evolucionando xunto coas novas tecnoloxías: “a música dance, aseguraba nunha entrevista, é como mirarche ao espello todos os días. Nunca observas cambios, pero se ves unha foto túa de fai un, cinco, dez ou vinte anos pensas ‘guau’. Como unha bacteria que se nega a morrer, simplemente mantense e segue evolucionando”.

Despois de 30 anos en activo, John Acquaviva continúa sendo un dos creadores máis inquietos e innovadores na música electrónica. Sinal de que el tamén se resiste a morrer e quere seguir evolucionando.

FONTE: José L. Álvarez Cedena/Xornal El País