XVII XOGOS PARALIMPICOS DE VERÁN 2024

Entre o 28 de agosto e o 8 de setembro de 2024, París acollerá os primeiros Xogos Paralímpicos de Verán que se celebran en Francia. Durante 11 días de competición disputaranse 549 eventos con medalla (271 masculinos, 235 femininos e 43 mixtos) nos 22 deportes que forman parte do programa paralímpico: atletismo, bádminton, baloncesto en cadeira de rodas, boccia, ciclismo, esgrima en cadeira de rodas, fútbol-5, goalball, judo, halterofilia, hípica, natación, piragüismo, remo, rugby en cadeira de rodas, taekwondo, tenis de mesa, tenis en cadeira de rodas, tiro con arco, tiro olímpico, tríatlon e voleibol sentado.

A 17ª edición paralímpica reunirá a 4.400 deportistas con discapacidade física, intelectual, visual e parálise ou lesión cerebral, chegados de 182 países. Aínda que a cifra de atletas é a mesma que nos Xogos de Tokio, si haberá importantes modificacións na repartición por deportes, co obxectivo de aumentar a participación feminina, protexer aos deportistas con maior discapacidade e equiparar as cotas nas modalidades por equipos.

Os Xogos de París contarán con 17 sedes de competición repartidas sobre todo entre o centro da cidade (nove instalacións) e a zona de Saint-Dennis, ao norte (tres). As outras cinco atópanse na periferia ou en localidades próximas. Algúns monumentos emblemáticos da capital francesa, como a Torre Eiffel, o Campo de Marte, Os Inválidos ou o Palacio de Versalles, serán escenario de probas paralímpicas.

A cerimonia de inauguración, celebrarase hoxe pola tarde, día 28 de agosto, na céntrica praza da Concordia, coas delegacións nacionais desfilando polos Campos Elíseos.

Para seguilos, AQUÍ tes o calendario de competición!