COIDADO! CAE Á TERRA A TIANGONG-1

 

A estación espacial chinesa Tiangong-1, un laboratorio espacial do tamaño dun autobús e que está fóra de control, caerá na Terra entre a mañá de hoxe, sábado, e a mañá do próximo luns, 2 de abril, segundo as últimas estimacións da Oficina de Residuos Espaciais da Axencia Espacial Europea (ESA) e de Aerospace Corporation, unha empresa de California.

A última actualización da China Manned Space (CMS), o programa espacial chinés de exploración humana, confirmaba que a Tiangong-1 xa se atopa a unha altura media de 202 quilómetros, cando estaba deseñada para operar a uns 400. O seu descenso, totalmente descontrolado, continuará ata o final da semana, momento en que a nave se desintegrará na atmosfera e caerá a terra. Polo momento, o laboratorio viaxa polo espazo a máis de 25.000 quilómetros por hora.

O lugar de impacto é descoñecido, pero considérase que afectará a unha zona de ata 2.000 quilómetros de longo e 70 de ancho na que poderán caer pedazos de tamaño indeterminado. Isto ocorrerá nalgunha rexión situada entre os 43º N e 43º S de latitude, na que é unha amplísima faja na que está a maior parte do globo: alí atópase España, Francia, Grecia, Portugal ou Italia, así como Australia e a maior parte do continente africano e suramericano.

A pesar de todo, non hai motivos para alarmarse. Dado que o 70 por cento da superficie do planeta está cuberta de auga e que a maior parte da terra firme está deshabitada, porque a poboación concéntrase nas cidades, a probabilidade de que a unha persoa caia un anaco da Tiangong-1 é dunha entre un billón, segundo Aerospace Corporation. En comparación, a probabilidade de gañar o Gordo cun décimo é dunha entre 100.000.

Resulta imposible predicir onde caerá, porque hai moitos factores moi variables a ter en conta: a consistencia da atmosfera, que depende da temperatura e da radiación solar, a orientación e o xiro da nave, que influirán moito na aerodinámica da caída, e a incerteza sobre a súa velocidade e posición exacta, dificultan moito saber que ocorrerá. De feito, o risco máis real parece estar relacionado coa presenza de hidrazina, un composto tóxico e corrosivo que pode liberar vapores daniños tras a caída, e que podería ser prexudicial se alguén manipulase os restos.

A Tiangong-1 mide 10,4 metros de lonxitude e está composta por dous cilindros dun tamaño similar: nun atópase un módulo de servizo e no outro un módulo de experimentación. Ademais, vai equipada con dous paneis solares de tres metros de ancho e sete de longo. Para empezar, aínda que é tan grande como un autobús e que alcanza as 8,5 toneladas métricas, a maioría dos seus compoñentes se desintegrarán na atmosfera grazas á fricción.

Esperemos que non caia na nosa terra!

FONTE: Xornal abc/ciencia