PREMIO FRONTEIRAS DO COÑECEMENTO EDICIÓN XIII

Karen O’Brien, Neil Adger e Ian Burton, XIII Premios Fundación BBVA na categoría de Cambio Climático (EP)/lavanguardia.com

Os investigadores Ian Burton, Neil Adger e Karen Ou’Brien obtiveron o Premio Fundación BBVA Fronteiras do Coñecemento na súa décimo terceira edición polas súas achegas sobre a forma de afrontar a crise climática. Todos eles incorporaron de maneira pioneira o concepto de adaptación á hora de afrontar os efectos do cambio climático. Cambiaron pois o paradigma da actuación fronte o quecemento, pois con anterioridade aos seus estudos as actuacións centrábanse e limitábanse á mitigación de emisións de gases de efecto invernadoiro.

O xeógrafo Ian Burton (Derby, Reino Unido, 1935), profesor emérito da Universidade de Toronto, abordou estes asuntos desde a investigación sobre desastres naturais, e foi pioneiro á hora de promover o concepto de ‘adaptación’ para facer fronte aos efectos do cambio climático que, á luz das previsións, son xa inevitables.

Neil Adger (Ballymena, Irlanda do Norte, Reino Unido, 1964), que recoñece o papel inspirador de Burton, concentrou a súa investigación nun dos principais efectos sociais do cambio climático: as migracións. Gran parte do traballo de Adger, catedrático de Xeografía Humana na Universidade de Exeter (Reino Unido), inclúe toma de datos sobre o terreo, coa realización de enquisas e entrevistas a poboación local en países como Vietnam e Bangladesh. As súas conclusións mostran que o grao de vulnerabilidade dunha poboación ao cambio climático depende moi directamente de medidas sociais e políticas, non unicamente do clima en si.

Tamén Karen Ou’Brien (Aquisgrán, Alemaña, 1963), catedrática de Xeografía Humana da Universidade de Oslo, investiga o impacto en poboacións vulnerables que, segundo o seu traballo, están sometidas a unha dobre exposición: ao cambio climático e á globalización. Segundo explicou onte ela mesma, “se na fotografía unha dobre exposición refírese a dúas imaxes que se solapan e crean unha imaxe borrosa, con este concepto expresamos como os procesos de globalización e do cambio climático superpóñense e crean desigualdade. Ambos os procesos non só solápanse, senón que retroaliméntanse”.

FONTE: lavanguardia.com