UNHA FLOR MINERAL EN MARTE

Na imaxe a flor fotografada pol rover Curiosity / NASA

A imaxe, desde logo, resulta en grao sumo sorprendente e dá ás á imaxinación. Foi captada hai apenas uns días polas cámaras do Curiosity, o rover da NASA que percorre o cráter Gale de Marte desde agosto de 2012, mentres estudaba unha serie de depósitos minerais. E un deles, de apenas un cm de ancho, era precisamente unha fermosa rocha ramificada e cuxas formas nos lembran ás do coral.

Aí termina, con todo, calquera similitude cun ser vivo. Trátase dun simple depósito mineral, caprichosamente esculpido pola auga cando esta aínda cubría unha boa parte do planeta vermello.

O rover obtivo a imaxe desta diminuta flor mineral o pasado 25 de febreiro e moi preto do Monte Sharp, que se alza no centro do cráter Gale.

A imaxe é unha composición de varias tomas obtidas co Mars Hand Lens Imager do Curiosity, capaz de capturar primeiros planos cunha lupa. Este tipo de foto composta permite que o rover produza imaxes moi detalladas.

A rocha, que recibiu o nome de Blackthom Salt, está composta de minerais que precipitaron tras mesturarse na auga antiga de Marte, segundo explicou Abigail Fraeman, científica do Curiosity. Este tipo de rochas poden ter varias formas, desde ramificadas, como é o caso, a practicamente esféricas, como as outras que aparecen na mesma fotografía.

"Vimos características diaxenéticas con formas similares antes -afirma  Fraeman-, pero esta forma  dendrítica é particularmente fermosa".

Ata o de agora, Curiosity descubriu varias outras características diaxenéticas, algo que non resulta sorprendente porque se cre que o cráter Gale puido ser, no pasado, un gran lago de máis de 150 km de ancho. Xa en 2004, o ’irmán maior’ do Curiosity, o rover Opportunity, atopou unha serie de pequenas esferas minerais de cor azul en Meridiani Planum, unha chaira preto do ecuador marciano. Pola súa tonalidade, que se debe ao seu alto contido de hematita (óxido de ferro), as esferas coñécense como ’os arandos marcianos’.

En todo caso, seguir documentando estas formacións rochosas é importante para axudar aos investigadores para determinar cando exactamente desapareceu a auga líquida de Marte. "Podemos aprender máis sobre a complexa e lonxeva historia da auga en Monte Sharp", asegura Fraeman. E iso podería revelar máis información sobre canto tempo a contorna podería ser potencialmente habitable para a vida.

FONTE: José Manuel Nieves/abc.es/ciencia