UNHA BACTERIA OBSERVABLE A SIMPLE VISTA

Thiomargarita namibiensis  (Foto: Max-Planck-Institute)

A Thiomargarita namibiensis é a bacteria (organismo procariota) máis grande coñecida, ata tal punto que pode ser observada a simple vista, podendo acadar os 750 μm (0,75 mm), aínda que o seu tamaño normal oscila entre os 0,1 aos 0,3 mm.

Foi descuberta por Heide H. Schulz et al. en 1999, en sedimentos fronte á costa de Namibia no curso dunha expedición oceanográfica a bordo do navío ruso "Petr Kottsov".

É unha sulfobacteria, que emprega no seu metabolismo os sulfuros que se producen no fondo mariño , así como os nitratos que toma da auga nun proceso anaeróbico (sen presencia de osíxeno).

O seu tamaño procede da inmensa vacuola onde almacena os nitratos.