ATOPAN UNHA PROBA DE QUE EXISTIU VIDA EN MARTE

Unha imaxe tomada polo rover Spirit da NASA, que mostra os saíntes de sílice sobre a superficie de Marte da NASA / JPL- Caltech

Os científicos Steven Ruff e Jack Farmer, da Universidade Estatal de Arizona (EE.UU.), sosteñen que uns inusuais xacementos minerais de sílice opalina achados na superficie de Marte poden ser creados por microbios, informa “The Independent”. De ser certa esta teoría, supoñería unha revolución na historia científica.

O proceso de estudo comezou cando o rover Spirit da NASA descubriu en 2009 estes xacementos minerais no interior do cráter marciano Gusev, un lugar que os astrobiólogos cren que unha vez estivo cuberto de augas termais e géiseres. Tras examinar o composto mineral con máis detalle, os científicos acharon que estaba recuberto dunha serie de protuberancias diminutas en forma de coliflor.

Para profundar na investigación, Ruff viaxou ao deserto de Atacama (Chile), unha área tan sumamente seca, inhabitada e elevada sobre o nivel do mar que representa un dos ambientes terrestres máis parecidos á superficie marciana. Alí o científico centrouse na rexión desértica do Tatio, repleta de géiseres, e quedou sorprendido ao achar formacións de sílice moi similares ás que foran descubertas en Marte.

Formacións minerais similares foron descubertas no parque nacional de Yellowstone (EE.UU.) e no chan volcánico do distrito Taupo (Nova Zelandia), coa diferenza de que nesta ocasión ían acompañadas de restos fósiles con marcas que confirman a existencia de antiga vida microbiana. Desta forma, os científicos sosteñen que se os microbios crearon estes xacementos minerais nestes lugares puideron facer o propio no deserto de Atacama e, por extensión, na superficie marciana.

O pasado decembro, Ruff e Farmer suxeriron nunha reunión da Unión Americana de Xeofísica que se se pretenden buscar probas de vida no planeta vermello, estas formacións podían ser un bo punto de partida. Aínda que o rover Curiosity da NASA, que actualmente se atopa en Marte, non pode explorar o cráter Gusey, o rover Marte 2020 teno establecido como un dos seus posibles lugares de aterraxe.

FONTE: RT/Ciencia