Blogia
vgomez

O ROBOT SOPHIA

Cando hai apenas un mes Sophia afirmou que cría merecer o dereito para formar unha familia, os peores temores de moitos apocalípticos disparáronse. Para os máis esaxerados, esta frase, pronunciada durante unha entrevista, era o equivalente a que unha Thermomix confesase o seu desexo de ser nai. Isto é así porque Sophia non é un ser humano, senón un robot moi especial construído a imaxe da actriz Audrey Hepburn e con capacidade para manter conversacións grazas á súa intelixencia artificial. Pouco antes destas declaracións, esta obra de Hanson Robotics (que pasa por ser a compañía responsable de crear os robots máis realistas do mundo) xa ocupara un importante espazo nos medios de comunicación, ao converterse no primeiro robot da historia en obter a cidadanía dun país, en concreto de Arabia Saudita, onde Sophia participaba nun evento científico. Unha anécdota, a de outorgar categoría de cidadá a unha máquina, que levantou non poucas críticas, tendo en conta que o reino saudita non se caracteriza precisamente polo respecto aos dereitos humanos.

Controversias aparte, a capacidade de Sophia para manter conversacións e a xesticulación do seu rostro mentres fala fannos imaxinar un futuro moi próximo ao que vimos nalgunhas películas: “Ata hai uns anos, cando lle dicía á xente que quería construír computadores que pensasen como humanos, case todo o mundo cría que estaba completamente tolo, que lía demasiada ciencia ficción”, asegura Ben Goerztel, director de tecnoloxía de Hanson Robotic e especialista en intelixencia artificial. A pesar do sorprendente que resulta Sophia, e da desconfianza que esperta nos máis escépticos, Goerztel cre que non temos nada que temer e que non asistiremos no futuro a un extreminio da nosa especie a mans de máquinas furiosas: “En Terminator hai moitas cousas que son ridículas, como homes cachas espidos que viaxan atrás no tempo”. A súa ironía vén a conto porque voces como a de Elon Musk ou Stephen Hawking alertaron do perigo de crear intelixencias artificiais demasiado intelixentes. Pero en Hanson Robotics non están de acordo con este punto de vista. Segundo eles é imposible que os robots nos escravicen, máis ben ao contrario declaran que o obxectivo da súa compañía é “crear un futuro mellor para a humanidade” a través de intelixencias artificiais que desenvolvan empatía, amabilidade e relacións verdadeiramente simbióticas cos humanos. Robots que nos acompañen, axuden, complementen e, en última instancia, sírvannos para resolver os “grandes problemas que deberemos afrontar no futuro”.

De momento, Sophia, a pesar de que de cando en vez algunha das súas declaracións resulte inquietante, ten ben aprendida a lección que lle ensinaron os seus programadores. Cando se lle pregunta que espera do futuro, sorrí e asegura “Basicamente a miña idea é que todos sexamos amigos”. Que o seu concepto de amizade sexa o mesmo que o noso ou unha oferta que é mellor non rexeitar é algo que teremos que descubrir (e talvez enfrontar) dentro de poucos anos.

FONTE: José L. Álvarez Cedena/Xornal El país

0 comentarios