PROTEUS, UNHA VERSIÓN SUBACUÁTICA DA EEI

O acuanauta, documentalista e ambientalista do océano Fabien Cousteau, neto do famoso explorador e investigador do mar Jacques Cousteau, vive segundo o principio de que “non existe unha cousa que sexa imposible” e agora disponse a facer realidade uno deses soños utópicos: a maior estación de investigación submarina de todos os tempos.

Durante anos, Fabien soñou con construír un xigantesco e moderno hábitat submarino, unha versión subacuática da Estación Espacial Internacional (EEI), que orbita a Terra a uns 400 quilómetros de altura, e que neste caso instalaríase a unha profundidade de 60 pés (18,28 metros), baixo unha presión equivalente a tres veces a da atmosfera.

O futuro laboratorio, que leva o nome dun deus do mar da mitoloxía grega, Proteus (Proteo), sen dúbida merecería estar no Olimpo da investigación e a arquitectura submarinas, pois o proxecto será catro veces máis grande que as actuais instalacións dese tipo e podería transformar a investigación subacuática para sempre.

Cousteau está a recadar os 135 millóns de dólares que farán falta para construír a estación, segundo a revista estadounidense ’Forbes’. Proteus consistirá, basicamente, en dúas plantas con forma de cilindros grosos e de pouca altura, unidos por unha rampla en espiral, das cales xurdirán unha serie de recintos ou cápsulas habitables con forma de ovo, e será construída cos mesmos metais e compostos dos cascos dos barcos.

A estación será unhas dez veces máis grande que Aquarius, o anterior laboratorio submarino de  Fabien  Cousteau, aínda en funcionamento e que ten unhas dimensións equivalentes ás dun autobús escolar, segundo a revista Fast Company. Isto significa que Proteus mediría ao redor de 370 metros cadrados.

Proteus, composta por unha instalación científica e un hábitat para investigadores, será a estación submarina máis avanzada destinada a investigar os problemas globais máis perentorios, segundo os seus deseñadores do Centro de Aprendizaxe Oceánica  Fabien  Cousteau (FCOLC) e o estudo do deseñador Yves Béhar.

Esta xigantesca instalación albergará laboratorios de última xeración equipados con conxeladores, microscopios e a tecnoloxía máis avanzada, co fin de desenvolver en cuestión de días investigacións que normalmente levaría anos completar utilizando os métodos e equipos convencionais.

Tamén poderá aloxar ata 12 persoas durante máis de 31 días, o cal supera a capacidade de calquera estación submarina xamais construída, e incluirá a primeira instalación de produción de vídeo a gran escala para transmitir programación educativa continuamente e en vivo, incluíndo tecnoloxías de realidade virtual e realidade aumentada, contando con colaboradores de todo o mundo, segundo FCOLC.

Esta ‘EEI baixa a auga’ será unha plataforma para que os principais investigadores, académicos, axencias científicas e corporacións colaboren para aplicar a ciencia en beneficio do futuro do planeta, abordando cuestións críticas para a humanidade como os achados medicinais, a sustentabilidade alimentaria e os impactos do cambio climático.

“O océano é o noso sistema de soporte vital e resulta indispensable para resolver os maiores problemas do planeta, que representan un risco multimillonario para a economía mundial, como o cambio climático, o aumento do nivel do mar, as tormentas extremas e os virus”, sinala Cousteau.

Cousteau considera esta estrutura subacuática “a primeira nunha rede de hábitats submarinos que permitirán efectuar descubrimentos e adquirir coñecementos baixo a auga que cambiarán a vida das futuras xeracións”.

A estación incluirá un invernadoiro submarino que permitirá aos seus habitantes producir plantas comestibles mediante hidroponía (cultivo sen terra) e estará alimentada por fontes de enerxía sostible, como a eólica, a solar e a conversión térmica oceánica (Otec), que aproveita as diferenzas de temperatura entre as distintas capas da auga para xerar electricidade.

FONTE: boyacaradio.com  Imaxe: elmundo.es