HUMBOLDT, O PAI ESQUECIDO DO ECOLOXISMO

 

Heroínas silenciadas, idealistas, soñadores e visionarios esquecidos son o obxecto de estudo da historiadora e escritora Andrea Wulf. Para coñecelos leu miles de cartas, percorreu medio mundo e mesmo escalou montañas. A ensaísta alemá é autora da multipremiada ‘A invención da natureza’, a excitante biografía de Alexander von Humboldt. “El proporcionounos o concepto de natureza que dá forma á nosa maneira de pensar actual e foi o primeiro en falar de cambio climático antropoxénico hai máis de douscentos anos”, asegura Wulf sobre o botánico e polímata alemán.

Andrea Wulf estudou Historia do Deseño no Royal College of Art de Londres, onde actualmente é profesora. Coa súa obra inspira e emociona aos lectores, mentres ofrece unha comprensión máis profunda do mundo que nos rodea. Entre os recoñecementos ao seu traballo destacan o prestixioso Royal Society Science Book Award ou o Costa Biography Award. A ensaísta é tamén autora de ’Founding Gardeners’ e ‘The Brother Gardeners’, ensaios sobre como os colonos americanos cambiaron a horticultura; ou ‘En busca de Venus: a arte de medir os ceos’, un traballo no que indaga como os científicos se uniron para medir o universo.

Dotada de maxia para a narración científica e con especial sensibilidade para a divulgación, Wulf acaba de publicar ’Magníficos rebeldes: os primeiros románticos e a invención do eu’. Un ensaio protagonizado por un grupo de amigos, de homes e mulleres, que cambiaron a nosa forma de ver o mundo. ”Os mozos do Círculo de Jena deron lugar ao Romanticismo e á nosa comprensión moderna da liberdade”, sentenza.