OS HEROES INVISIBLES

A Irene Vallejo a súa paixón pola literatura vénlle desde pequena, cando a súa nai, cada noite, alimentaba a súa imaxinación contándolle contos antes de irse a durmir.

Neta de mestres e filla de grandes lectores, Irene medrou nunha casa rodeada de libros, foi unha nena curiosa e esperta que atopou nos textos literarios un lugar ao que agarrarse cando, con tan só 8 anos, sufriu acoso escolar `Eu creo que todas as persoas que amamos os libros nun momento ou outro, sentimos que nos acompañaban, que nos protexían, que creaban un espazo seguro e confortable onde sentirnos comprendidos´, apunta.

Vallejo converteu a súa paixón polas palabras na súa profesión. Doutora en filoloxía Clásica polas Universidades de Zaragoza e Florencia, o seu labor céntrase na investigación e divulgación de autores clásicos.

Colaboradora habitual de diferentes xornais, en 2011 publicou a súa primeira novela - A Luz Sepulta –, e desde entón converteuse nunha das escritoras máis relevantes da súa xeración.

A súa carreira literaria alcanzou un fito en 2019 co Infinito nun xunco, onde a autora explora a historia dos libros desde as súas orixes ata os nosos días. Un ensaio con máis dun millón de exemplares vendidos, traducido a máis de 30 idiomas e polo que foi galardoada co Premio Nacional de Ensaio.

En 2023 publicouse a súa adaptación gráfica, unha obra na que Irene Vallejo colaborou co ilustrador Tyto Alba, engadindo unha dimensión visual ao texto orixinal, que acompañan e complementan o relato.