CLAVES PARA REGALAR XOGUETES

 

Imma Marín é unha firme defensora do xogo na infancia. Segundo explica: “Na Convención dos Dereitos do Neno de 1989, asinada por 20 países, recoñeceuse o dereito fundamental dos nenos e nenas a xogar, xunto a dereitos tan básicos como a protección ou a alimentación. Así de importante é o xogo para os nenos”. Como experta en aprendizaxe lúdica, asegura que a función principal dos xoguetes debe ser divertir: “O xogo ten beneficios colaterais. A través da diversión, os nenos desenvolven aspectos fundamentais para a súa aprendizaxe; como a creatividade, o esforzo, a cooperación ou a concentración”. E engade: “Grazas á  neurociencia, sabemos que o xogo é emoción. E sen emoción, non hai aprendizaxe”. Respecto ao dilema de ter poucos ou moitos xoguetes, asegura que “o verdadeiramente importante é ter un bo repertorio lúdico, que inclúa xoguetes de varios tipos, capaces de estimular diferentes facetas do desenvolvemento”. Especialista en ‘Gamificación’ ou ‘Ludificación’,  Imma Marín insiste na importancia de desenvolver novas formas de educar a través do xogo, tanto na familia como nas escolas: “A aprendizaxe lúdica é capaz de lograr que os nenos e nenas sentan protagonistas da súa propia educación, e isto fai que teñan máis ganas de aprender”. Diplomada en Maxisterio,  Imma Marín exerce na actualidade como consultora de educación e formación a través do xogo. É presidenta da IPA en España, a Asociación Internacional polo dereito dos nenos e nenas a xogar. E autora, entre outros, dos libros ‘Xogamos?: Como a aprendizaxe lúdica pode transformar a educación’ e ‘O pracer de xogar: Aprende e divírtete xogando cos teus fillos’.