5 DE XUÑO 2019: DÍA MUNDIAL DO MEDIO AMBIENTE

Loita contra a contaminación do aire / Imaxe: elblogverde.com

Hoxe, 5 de xuño, celébrase o Día Mundial do Medio Ambiente. Foi establecido pola Asemblea Xeral das Nacións Unidas en 1972 coincidindo co primeiro cumio mundial sobre medio ambiente: a Conferencia de Estocolmo sobre o Medio Ambiente Humano. Os fins deste evento anual, que comezou a celebrarse en 1974, son o aumentar a conciencia ambiental e fomentar a acción global na protección do medio ambiente.

Nesta edición, dedicarase á loita contra a contaminación do aire, sendo China o anfitrión da celebración.

Aproximadamente 7 millóns de persoas en todo o mundo falecen prematuramente cada ano debido á contaminación do aire e, destas, preto de 4 millóns habitan na rexión de Asia e o Pacífico.

Os datos son preocupantes: o 92% dos habitantes do mundo non respira aire limpo, coa particularidade de que a contaminación do aire ten un custo económico global de 5 billóns de dólares estadounidenses cada ano debido aos gastos en asistencia social.

Ademais, estímase que a contaminación por ozono a nivel do chan reducirá o rendemento dos cultivos básicos nun 26% para 2030. O obxectivo da conmemoración do Día Mundial do Medio Ambiente 2019 é instar os gobernos, a industria, as comunidades e os cidadáns para sumar esforzos para explorar solucións a este problema a través das enerxías renovables e as tecnoloxías sustentables.

FONTE: ecoticias.com