AS MARABILLAS NATURAIS MÁIS ESTRAÑAS DA TERRA XIII

Continúo coa serie as marabillas naturais máis estrañas da Terra, onde viaxaremos polo mundo natural, que nos amosa formas caprichosas, ecosistemas ancorados en milenios pasados, formas misteriosas,...

Hoxé imos a...

13. Cristais de xeso da cova de Naica (México)

Espectáculo extraterrestre? Quizá o dalgún fragmento dos conxelados aneis de Saturno? Pois vai ser que non, que non é necesario opositar a astronauta para poder acceder a este portentoso universo de seres inorgánicos elementais, os cristais de xeso máis xigantescos xamais achados en parte algunha. Tan só temos que viaxar á serra de Naica, ao sur da cidade de Chihuahua, en México. Unha vez alí, introducirnos 300 metros baixo terra e, apelando á nosa boa estrela, manternos vivos uns minutos mentres admiramos as selenitas, nome científico de tales cristais, xa que a temperatura da gruta, superior aos 50º C, e a súa humidade inhumana, case do 100%, non fan dela un lugar precisamente apto para ir de picnic.

Descuberta por casualidade en 2000 por dous obreiros da mina de Naica, considérase un dos achados xeolóxicos máis importantes do noso tempo. As selenitas, que se entrecruzan desde o chan ata o teito nunha madeixa inextricable con aparencia de brillantes  témpanos de xeo, miden, na súa maioría, uns 6 metros de lonxitude (aínda que as maiores chegan aos 11), alcanzando espesores dun metro e un peso de 50 toneladas. Diante tamañas dimensións, as da cova non deixan de ser exiguas: 50 metros de longo por 20 de ancho.

Descender á caverna de Naica é como facelo ás caldeiras de Pedro Botero. As súas condicións ambientais extremas impiden permanencias superiores aos 10 minutos, baixo risco de sufrir un shock térmico ou un colapso por deshidratación. Recentemente, o equipo de investigadores demostrou que as selenitas medraron de modo milimétrico, ao redor do grosor dun cabelo humano por século. É a velocidade máis lenta xamais medida na formación de cristais. Coñecendo os seus tamaños actuais, un simple cálculo aritmético dinos que se orixinaron… fai un millón de anos! A máis refinada e repousada ourivaría da radiante matriz da Terra.

FONTE: Javier Jayme/abc.es