WASP-76b: O PLANETA INFERNAL NO QUE CHOVE FERRO

Recreación do exoplaneta ardente WASP-76b / ESO/M. Kornmesser

Imaxinade un planeta tan quente que o ferro evapórase, condénsase e logo cae do ceo coma se fose chuvia. Aterrador? Pois en realidade as cousas son aínda peores.

Este mundo xigantesco e peor que un inferno, considerado un Xúpiter ultraquente, chámase WASP-76b e atópase a uns 640 anos luz da Terra. Descuberto en 2016, orbita tan preto da súa estrela (un tipo F, un pouco máis ardente que o noso Sol), que o seu ano non chega sequera a dous días terrestres.

O planeta ten dúas caras fixas xa que, como a Lúa ao redor da Terra, tarda o mesmo en rotar sobre o seu eixo que en dar a volta ao redor da súa estrela. Segundo un estudo anterior no que participaba o Consello Superior de Investigacións Científicas (CSIC), na cara diúrna as temperaturas poden superar os 2.400ºC, mentres que na nocturna, sumida na escuridade perpetua, os fortes ventos transportan o vapor férreo ata caer en forma de pingas.

O lado diúrno recibiría miles de veces máis radiación da súa estrela que a que chega á Terra desde o Sol. É tan sufocante que as moléculas se dividen en átomos e metais, como o ferro, e evapóranse cara á atmosfera. Pero poida que os 2.400ºC estimados polos investigadores quedáronse curtos.

Coa axuda do observatorio Gemini North en Hawai, un equipo internacional acaba de descubrir calcio ionizado no planeta, o que suxire que a súa temperatura atmosférica é aínda máis alta do que se pensaba anteriormente ou que ventos diabólicos azoutan a súa atmosfera superior. O achado foi publicado na revista Astrophysical Journal Letters e presentado na reunión anual da División de Ciencias Planetarias da Sociedade Astronómica de Estados Unidos.

"Estamos a ver moito calcio; é unha característica realmente forte", afirma Emily Deibert, da Universidade de Toronto e primeira autora do estudo. Segundo explica, "esta firma espectral podería indicar que o exoplaneta ten ventos na atmosfera superior moi fortes. Ou que a temperatura atmosférica é moito máis alta do que pensamos".

Os resultados da investigación son os primeiros dun proxecto de varios anos chamado ExoGems, dirixido pola Universidade de Cornell, que explora a diversidade de atmosferas planetarias.

"A medida que fagamos a detección remota de ducias de exoplanetas, que abarcan un rango de masas e temperaturas, desenvolveremos unha imaxe máis completa da verdadeira diversidade de mundos extraterrestres, desde aqueles o suficientemente quentes como para albergar chuvia de ferro ata outros con climas máis moderados; desde aqueles máis pesados que Xúpiter a outros non moito máis grandes que a Terra", di Ray Jayawardhana, profesor de astronomía en Cornell.

"É notable que cos telescopios e instrumentos de hoxe en día xa podamos aprender moito sobre as atmosferas, os seus constituíntes, propiedades físicas, presenza de nubes e mesmo patróns de vento a gran escala, de planetas que orbitan estrelas a centos de anos luz de distancia", engade.

FONTE: abc.es/ciencia