DESCOBREN UNHA NOVA ESPECIE DE DINOSAURO CON TRAZOS ÚNICOS

Científicos do Museo de Historia Natural e a Universidade de Portsmouth describiron un novo xénero e especie de dinosauro a partir dun espécime atopado na Illa de Wight.

A nova especie de dinosauro presenta un nariz inusualmente grande e o seu descubrimento foi posible grazas a un doutor inglés xubilado de 64 anos que pasou encerrado un tempo furgando en caixas de centos de ósos vellos. E alí atoparon un fósil nasal único. Os seus restos foron escavados orixinalmente en 1978 na Illa de Wight en Reino Unido, pero foron confundidos co seu parente máis famoso, o Iguanodon, durante décadas ata que os investigadores examinárono por segunda vez.

De feito, o seu parecido resulta familiar, pero este dinosauro de aproximadamente 128 millóns de anos, foi reconstruído con diversos ósos, incluídos algúns do cranio, a columna vertebral e as cadeiras, suficiente para que o investigador Jeremy Lockwood da Universidade de Portsmouth, identificasen unha nova especie de dinosauro. Foi bautizado como Brighstoneus simmondsi, en honra ao pobo próximo de Brighstone e ao descubridor do dinosauro, Keith Simmonds.

O dinosauro herbívoro en cuestión, mediría uns 8 metros de longo, pesaría uns 900 quilogramos, e contaría cun característico nariz bulbosa e unha boca con ata 28 dentes.

Algunhas das características máis destacadas que marcan a Brighstoneus como unha nova especie atópanse no cranio do dinosauro, como podemos apreciar na reconstrución feita polos expertos e publicada recentemente en Journal of Systematic Palaeontology.

"Para min, o número de dentes era un sinal. O  Mantellisaurus ten 23 ou 24, pero este ten 28. Tamén tiña un nariz bulbosa, mentres que as outras especies teñen narices moi rectos. En conxunto, estas e outras pequenas diferenzas fan que sexa obviamente unha nova especie", explica  Lockwood.

O descubrimento desta nova especie suxire que houbo moitos máis dinosauros iguanodontes no  Cretácico Temperán do Reino Unido do que se pensaba.

"Estamos a ver seis, talvez sete millóns de anos de depósitos, e creo que as lonxitudes dos xéneros hanse  sobreestimado no pasado", continúa  Lockwood. “Se ese é o caso na illa, poderiamos estar a ver moitas máis especies novas. Parece moi pouco probable que dous animais sexan exactamente iguais durante millóns de anos sen cambios".

A Illa de Wight asociouse durante moito tempo co descubrimento de dinosauros, e mesmo permitiu o achado dos  especímenes cruciais que levaron a Sir Richard Owen a acuñar o termo Dinosauria. Os autores conclúen que a descrición de Brighstoneus simmondsi como unha nova especie require unha reevaluación do material fósil da Illa de Wight.

"Os dinosauros británicos non son en absoluto algo que se acabou. Creo que poderiamos estar nun pequeno renacemento", conclúe  Lockwood.

FONTE: Sarah Romero/muyinteresante.es