UN CANTO AGRADECIDO Á VIDA

 

Soledad Bravo é a voz viva que tende pontes entre España e Latinoamérica. Rioxana de nacemento e venezolana de adopción, a súa traxectoria vital e musical está intimamente relacionada coa historia das últimas décadas. "O meu pasado é meu e perténceme. Forma parte do meu sangue, do meu ADN e da miña maneira de ver a vida", reflexiona a cantante e compositora. 

Filla dun mestre que lle fixo amar a poesía, pronto atopou na música, a linguaxe para comunicarse. Desde os seus inicios, vinculados ao folclore e a canción reivindicativa, a súa extraordinaria voz e a súa guitarra deron corpo a palabras de poetas como León Felipe, Rafael Alberti ou Mario Benedetti, e a grandes compositores e cantautores latinoamericanos, como Pablo Milanés e Silvio Rodríguez. 

«Cheos de tantas falsas palabras como andamos, entre ofertas e slogans e ritmos traizoeiros, por amor á miña fe e á vida que vén, canto á poesía dos meus compañeiros», entoa a artista.

Con máis de catro décadas de traxectoria e 30 álbums publicados, eloxiados por público e crítica, Soledad Bravo é o estandarte da nova canción latinoamericana, cun amplo rexistro musical que vai desde o cancioneiro popular aos cantos sefardís, pasando por boleros, rancheiras e mesmo canción urbana contemporánea.