DESCUBERTA NOS PIRINESOS RESTOS DA MAIOR TARTARUGA MARINA DO MUNDO

Recreación da Leviathanochelys aenigmatica

Investigadores do Institut Català de Paleontoloxía Miquel Crusafont, do Museo da Conca Dellà e da universidade checa de Masaryk Brno (MU) describiron na revista Scientific Reports a nova especie de tartaruga mariña de hai uns 83 millóns de anos: Leviathanochelys aenigmatica. O seu nome científico significa "a tartaruga leviatán enigmática", en referencia ao Leviatán unha besta bíblica mariña de enormes dimensións debido ás peculiares características esqueléticas deste animal, que deixou perplexos aos paleontólogos que a escavaron.

"A sorpresa foi maiúscula. O certo é que non son habituais os restos de réptiles mariños nos Pireneos e menos destas dimensións", explica Óscar Castelo, investigador do Institut Català de Paleontologia Miquel Crusafont (ICP) e o Museo da Conca Dellà (MCD), que asina o artigo de investigación. Os restos fósiles deste réptil, do que só se coñece parte do seu caparazón e a pelvis, permiten estimar unha lonxitude total da cuncha de 3,7 metros de longo. Trátase da tartaruga mariña máis grande de Europa e a segunda do mundo, só superada polo xénero Archelon de América do Norte, que medía ata catro metros e medio de longo.

"A morfoloxía dos fósiles tamén era moi curiosa, no proceso de investigación tivemos claro que se trataba dunha nova especie para a ciencia", afirma o paleontólogo. O estudo científico suxire que Leviathanochelys é un dos representantes máis antigos das Chelonioidea, o grupo que inclúe a todas as tartarugas mariñas actuais.

Máis aló das súas colosais dimensións, a nova especie de tartaruga presenta unhas protuberancias na parte anterior da pelvis nunca vistas en ningunha outra tartaruga, nin terrestre nin mariña. O equipo de investigación cre que estas proxeccións óseas, ligadas á musculatura que controlaba a contracción do ventre do animal, poderían participar en funcións relacionadas co sistema respiratorio de Leviathanochelys. As características anatómicas desta nova especie suxiren que tiña un estilo de vida pelágico e era capaz de alcanzar grandes profundidades.

O rexistro fósil dos Pireneos é coñecido mundialmente polos numerosos restos de dinosauros que se escavaron e que permitiu describir novas especies para a ciencia. Nos últimos anos describíronse tres especies únicas destes animais nesta rexión, como son o xigantesco Abditosaurus, un titanosaurio de máis de 15 metros de longo, o diminuto e escurridizo carnívoro Tamarro e o hadrosaurio primitivo Fylax. Estas especies son algúns dos últimos representantes de dinosauros que viviron en Europa hai uns 70 millóns de anos, pouco antes de que se extinguisen por todo o mundo.

FONTE: elmundo.es/ciencia