ROZANDO O SOL!

En Noiteboa, mentres unha gran parte do planeta Terra ceaba cos seus seres queridos, un fito histórico estaba a fraguarse a uns 150 millóns de quilómetros das nosas casas: unha sonda batía o récord de achegamento ao Sol, chegando a 6,1 millóns de quilómetros da súa superficie (o que, en termos astronómicos, é case rozar a nosa estrela) a unha endiablada velocidade de 692.000 quilómetros por hora.

A proeza foi confirmada pola NASA despois de dous días sen comunicación coa nave, bautizada como Parker Solar Probe e lanzada en agosto de 2018. "Tras a súa aproximación máis próxima ao Sol, un récord, a sonda solar Parker da NASA transmitiu un sinal á Terra indicando que se atopa en bo estado e funciona normalmente", sinala Michael Buckley, do Laboratorio de Física Aplicada de Johns Hopkins, na nota que confirma que, efectivamente, un dos fitos da misión, o de case ’tocar’ a nosa estrela, cumpriuse.

A ’chamada’ da Parker Solar Probe produciuse xusto antes da medianoite do 26 de decembro, á primeira hora da mañá de onte venres en España. O silencio era algo esperado: a nave debía dar a volta por detrás do Sol para volver contactar cos equipos na Terra, algo que se esperaba que tardase uns dous días. Despois da confirmación de que todo foi ben, o equipo espera recibir o paquete completo de información do sobrevoo (os datos de telemetría detallados) estreando o aninovo, o 1 de xaneiro.

A nave, que soportou temperaturas de máis dun millón de graos Celsius, tivo que manter, con todo, os seus instrumentos a salvo desta calor ardente, xa que para o seu correcto funcionamento teñen que permanecer en ao redor de 29 graos centígrados. Toda unha proeza, xa que durante o seu voo ao Sol a nave tamén tivo que enfrontar temperaturas de 200 graos negativos.

FONTE: P. Biosca/abces/ciencia