DÍA INTERNACIONAL DO LIBRO

Hoxe é o Día Internacional do Libro, unha conmemoración celebrada cada 23 de abril a nivel mundial co obxectivo de fomentar a lectura, a industria editorial e a protección da propiedade intelectual por medio do dereito de autor. Desde 1988, é unha celebración internacional promovida pola UNESCO.

Trátase dun día simbólico para a literatura mundial, xa que ese día, en 1616, faleceron Cervantes, Inca Garcilaso de la Vega e Shakespeare (Cervantes en realidade morreu o 22, pero foi soterrado o 23, e en canto a Shakespeare, ese 23 de abril corresponde ao calendario xuliano, vixente aínda na Inglaterra isabelina).

A miña recomendación persoal para este día é CANDO A TORMENTA PASE (Cuando la tormenta pase) de Manel Loureiro (Pontevedra, 1975). Escritor e licenciado en dereito pola Universidade de Santiago de Compostela, traballou como presentador e guionista na Televisión de Galicia e é colaborador en xornais como o Diario de Pontevedra, ABC e O Mundo. En 1920 xa publicara A porta (La puerta)

Cando a tormenta pase acadou o Premio de Novela Fernando Lara 2024. o libro é un thriller puro ambientado nas illas Ons. Nel combínase o misterio clásico coa mitoloxía galega. Ademais, o seu estilo é áxil e cinematográfico, o que fai que a lectura sexa fluída.

Sinopse: Atrapado en Ons, unha pequena illa da costa atlántica galega, Roberto Lobeira non ten posibilidade algunha de chegar a terra firme nin de comunicarse co exterior debido a unha tormenta que parece ser o preludio dunha traxedia. Cando descobre un fardo que as ondas levaron ata a beira, o seu contido provoca que os poucos habitantes que viven na illa dean renda solta a décadas de rancor, celos, vellas contas que saldar e sede de vinganza. E, aínda por riba, unha presenza misteriosa e asexante deixa unha ofrenda sanguenta na porta da súa casa, coma se tratásese dunha enigmática mensaxe que non pode comprender. Inmerso nun bulebule de odio, segredos inconfesables e ambición desmedida, Lobeira terá que sobrevivir na illa… ata que a tormenta pase.

Bo Día do libro!

Imaxes: gobiernodecanarias.org e arnoia.gal