CANTO SABES SOBRE A HISTORIA DA ARTE? XI
Continúo coa serie CANTO SABES SOBRE A HISTORIA DA ARTE como disciplina académica, restrinxida ás denominadas artes visuais ou plásticas (esencialmente a pintura, escultura e arquitectura).
A contestación correcta á pregunta de onte é Románico. A arte románica foi o estilo artístico predominante na Europa cristiá dende mediados do século XI ata finais do século XII, abarcando tamén parte do XIII ata a chegada do Gótico. Tal como se apreciaba na imaxe da pregunta en cuestión, a construción máis típica era unha igrexa de planta de cruz latina con 3 naves, aínda que tamén se atopará algunha de planta grega. A nave central é sempre máis ampla que as laterais. A igrexa ten un transepto que dá ao cruceiro, lugar onde se sitúa o cimborrio. As cabeceiras da igrexa adoitan terminar en ábsidas semicirculares, que se multiplican ao final das tres naves e onde, ás veces, están completadas polas absidiolas. As técnicas da época non eran moi modernas, así que as construcións non eran sinxelas e os muros debían ser grosos para poder soster todo o sistema abovedado. Tampouco se podían abrir grandes vans ou xanelas en devanditos muros, polo que o interior era bastante escuro. No interior, as columnas tiñan base, plinto e fuste, ademais dun capitel habitualmente historiado con motivos pedagóxicos, relixiosos ou xeométricos, ademais de monstros. En canto aos teitos, hai que dicir que estaban cubertos por bóvedas, habitualmente de canón con arcos faxones ou de aresta, e estaban sustentados, ademais de polos muros, por un sistema de arcos de medio punto de sección rectangular e algúns estribos ou contrafortes, tanto exteriores como interiores. A igrexa completábase cunha ou dúas torres que flanqueaban a entrada ao templo e, en ocasións, con outras construcións anexas. Esta estrutura podemola ver na nosa Catedral de Santiago de Compostela.
E imos coa pregunta de hoxe!
11. Como se chama esta obra de O Bosco?
- O inferno, o limbo e o paraíso
- O xardín dos milagres
- O xardín das delicias
Mañá a solución e unha nova pregunta!
FONTE: Idea orixinal culturizando.com, buhosdeatenas.blogspot.com e es.wikipedia.org Imaxe: gl.wikipedia.org
