UVIGO E MARTE

Exterior da base deseñada poos investigadores da UVigo /ILUSTRACIÓN: IRENE PÉREZ

Investigadores do grupo de Tecnoloxías Aeroespaciais da Universidade de Vigo desenvolveron un deseño conceptual dunha base humana en Marte, que conta con tres pisos para laboratorios e vivenda sobre unha planta hexagonal. Tal como recóllese no Diario da Universidade de Vigo (DUVI), a chegada do ser humano a Marte é un dos retos máis ambiciosos das distintas axencias espaciais. A NASA ten o obxectivo de mandar astronautas ao planeta vermello a finais da década dos 30 ou a principios dos 40 do século actual (2030/2040).

Por iso, científicos da UVigo realizaron o deseño conceptual desta base humana en Marte, centrando a súa investigación no comportamento térmico da estrutura proposta para facer viable a presenza humana no planeta veciño.

O grupo de Tecnoloxías Aeroespaciais, dirixido polo profesor Fernando Augado, leva varios anos traballando en proxectos relacionados coa colonización de planetas e satélites do Sistema Solar. Entre as iniciativas máis destacadas neste ámbito está a súa colaboración no deseño integrado dun vehículo guindastre para explorar o interior de tubos de lava na Lúa.

Continuando con esta liña, membros do grupo realizaron o deseño dunha base humana en Marte. Os resultados da súa investigación aparecen publicados na revista Acta Astronáutica. "É necesario propoñer posibles deseños de hábitat para aloxar a seres humanos nunha contorna tan hostil como o marciano e esta quere ser nosa primeira contribución neste ámbito", destacan membros do proxecto, quen defininen estancias para vivenda, con dormitorios, aseos e zonas comúns, e outras para albergar laboratorios, para a realización de experimentos.

Segundo explican os seus responsables, o estudo parte dunha idea acordada o pasado curso académico para a realización dun Traballo de Fin de Grao polo alumno de grao de Enxeñería Aeroespacial en Ourense Marcos Salgado. "O potencial do TFG realizado fixo posible desenvolver a investigación publicada agora, grazas á incorporación ao equipo do profesor da área de Enxeñería Aeroespacial Alejandro Gómez e da investigadora do grupo de Tecnoloxías Aeroespaciais Uxía García", indicaron. Neste sentido, subliñan que Marte é un planeta cuxas condicións "non son apropiadas para a vida do ser humano". Por iso, a análise centrouse nun primeiro momento nos principais aspectos que conforman a contorna marciana, como a súa atmosfera, a súa temperatura (cun rango moi alto que vai desde os 100 graos baixo cero ata os 20 graos), a súa radiación (letal por non ter magnetosfera) ou os seus chans. "O hábitat deseñado tamén tiña que cumprir unha serie de requisitos que facilitasen longas estancias, como sinxeleza, resistencia e habitabilidade para un apropiado benestar psicolóxico", engaden. Por iso, o equipo investigador desenvolveu un deseño conceptual do hábitat baseado nunha estrutura fabricada integramente na Terra e realizado tras un estudo das alternativas previas, tentando combinar as vantaxes dalgunhas á vez que minimizar os seus inconvenientes. En concreto, o hábitat creado ten unha planta hexagonal, de 4,5 metros cada lado, e está formado por tres plantas de 2,8 metros de altura cada unha delas. Os materiais principais empregados son aliaxes de aluminio.

FONTE: atlantico.net