COMO NOS INFLÚE O TEMPO?

 

Existe un vento na península arábiga capaz de volvernos tolos. E un lago misterioso na India que alberga centos de esqueletos. A Lúa ás veces vólvenos lunáticos e, algunhas quenllas, son capaces de predicir furacáns. O noso planeta é fascinante. A súa natureza e o seu clima son unha fonte inesgotable de beleza, curiosidade e misterio. Sábeo ben a meteoróloga e doutora en Ciencias Físicas Mar Gómez.

A súa paixón por comprender os segredos da Terra e o cosmos comezou cando era unha nena. Unha curiosidade científica que herdou da súa nai, matemática de profesión. Pero, segundo afirma, doutorouse Cum Laude en Físicas grazas á súa avoa: “Unha muller que non tivo a oportunidade de estudar, pero que sempre me inculcou o seu tesón e a súa constancia”, explica con agarimo. Mar Gómez avoga pola importancia das mulleres na ciencia e defende a necesidade de que as nenas teñan referentes femininos neste campo.

Excelente comunicadora, compaxina o seu traballo como meteoróloga na páxina web eltiempo.es, co seu labor de divulgación científica. É directora e presentadora do podcast ‘Planeta Oculto’, onde explora os misterios ocultos máis profundos do noso mundo e o universo. Tamén é autora de dous libros: ‘En que se parecen as pingas de choiva ao pan de hamburguesa: 120 curiosidades científicas relacionadas coa meteoroloxía’ (2021) e ‘Meteorosensibles: como o tempo inflúe na nosa saúde física e mental’ (2023). Colaborou con importantes medios de comunicación nacionais e internacionais, como National Geographic, TVE ou a BBC, e participa habitualmente como conferenciante en foros para a concienciación sobre o cambio climático.