A NASA FAINOS VOAR ENTRE OS PIARES DA CREACIÓN

En abril de 1995 publicouse a impresionante e icónica imaxe que se deu en chamar os Piares da Creación. Foi tomada polo telescopio espacial Hubble. Décadas despois, o telescopio espacial James Webb superouna.

O Webb xa tomara imaxes da nebulosa do Águila (onde se atopan os piares), pero agora os astrónomos combinaron os datos do Hubble e do Webb para crear unha asombrosa animación en 3D dun voo a través da nebulosa.

Imaxe dos Piares da Creación do Hubble (esquerda) e o James Webb (dereita) / NASA

Os Piares da Creación están compostos principalmente por hidróxeno molecular frío e po. Están a ser desgastados por fortes ventos e pola radiación ultravioleta emitida por estrelas novas e quentes próximas. Os piares, que parecen grandes dedos cósmicos, teñen protuberancias adicionais, maiores que o sistema solar, que se estenden desde as súas cimas. Dentro destes dedos hai estrelas novas e quentes. O máis alto dos piares mide tres anos luz de arriba abaixo.

A nova e asombrosa película en 3D lévanos de viaxe a través das estruturas dos piares, baseándose en datos de observación reais dun estudo científico dirixido por Anna McLeod, profesora asociada da Universidade de Durham (Reino Unido). O vídeo permítenos facerse unha idea de como poden colaborar os dous telescopios espaciais.

FONTE: Baltasar Pérez/quo.eldiario.es/ciencia