SABÍAS QUE... POR QUE AS CANAS SON DE DIFERENTES CORES?

Os días, as semanas e os anos pasan polas nosas vidas de forma inexorable provocando cambios químicos e biolóxicos, os cales se traducen na aparición de manchas na pel, engurras ou liñas de expresión e encanecimento capilar.

A aparición das canas pode ser debida, ademais do paso do tempo a outros factores, desde os xenéticos ata situacións de estrés, pasando por déficits alimentarios, tabaquismo, hixiene inadecuada ou produtos químicos que poidan danar o coiro cabeludo.

Desde un punto de vista biolóxico as canas son pelos que carecen do pigmento que dá cor ao cabelo e que recibe o nome de melanina. Esta, á súa vez, pode ser de dous tipos: eumelanina e feomelanina.

A eumelanina, que pode ser marrón e negra, atópase non só no cabelo, senón tamén na pel e no iris, e a súa concentración é a responsable da coloración negra, loura e castaña do cabelo. Nos seres humanos este tipo de melanina é máis frecuente nas persoas de pel escura.

Pola súa banda, a feomelanina é a responsable das tonalidades que oscilan entre o rosa e o vermello, e atópase en grandes cantidades nos cabelos das persoas roxas, nos beizos, as mamilas, o glande e a vaxina.

A combinación dos dous tipos de melanina, nas súas diferentes concentracións, é a responsable de todas as variantes de cor de cabelo que existen no mundo.

A fábrica celular que se encarga de producir a melanina é o melanocito, o cal ademais é responsable de transportar a melanina ata os queratinocitos, as células produtoras de queratina.

Cando os melanocitos deixan de funcionar o transporte cara aos queratinocitos interrómpese e comezan a aparecer as canas. Debido a que non hai melanina, os cabelos non se poden ’tinguir’, é dicir, non poden ser nin verdes nin vermellos, e adoptan a tonalidade esbrancuxada que todos coñecemos.

Se descendemos un banzo nos aspectos bioquímicos, a aparición das canas garda relación coa diminución da actividade dunha encima (MSR), a cal neutraliza o peróxido de hidróxeno, cuxa acción consiste en inhibir unha das encimas necesarias para producir melanina. En Román paladino, ao haber máis peróxido de hidróxeno non producimos a suficiente melanina.

Agora ben, todos habemos visto que as canas non sempre son iguais, hai algunhas persoas nas que adoita comezar polas tempas e a parte posterior da cabeza, ata contemplar todo o cabelo, é o que chamamos canicie fisiolóxica. Noutras persoas os guechos están localizados, fundamentalmente en cellas ou pestanas, a este tipo denominámolo poliosis. Ademais, hai un terceiro grupo no que a canicie está repartida de forma descontinua por todo o corpo cabeludo, é o que cientificamente se coñece como canicie anular.

No ano 2020 un grupo de investigadores da Universidade de Harvard realizou un estudo en ratos para coñecer por que motivo o estrés está relacionado co encanecimiento do cabelo. Os científicos chegaron á conclusión de que o motivo garda relación co sistema nervioso simpático.

E é que o estrés activa o sistema nervioso simpático, inducindo a liberación de noradrenalina que actúa sobre as células nai dos melanocitos e provoca que se activen de forma excesiva, unha fervenza que provoca finalmente un maior número de células produtoras de pigmento e que, por tanto, esgótense as reservas.

Este estudo demostrou por vez primeira a relación que existe entre o estrés e a aparición de canas, un feito que parecía máis que evidente, pero do que se carecía de evidencia científica.

FONTE: Pedro Gargantilla/abc.es/ciencia    Imaxe: larazon.es