Bruce Willis acaba de cumprir 64 anos. E, aínda que se conserva nunha excelente forma física, xa non parece tan boa idea deixar nas súas mans a seguridade do noso planeta. Ninguén como el desempeñou ese papel de heroe canalla e expeditivo que o mesmo cribaba a un terrorista que aceleraba a fondo para poñer en órbita unha nave espacial cara a unha morte moi probable. E todo, por suposto, sen perder o sorriso socarrón do que aposta a dobre ou nada en cada unha das súas xogadas. Willis fíxosenos maior, e agora a idea de enviarlle a miles de quilómetros da Terra cargado de explosivos para destruír un asteroide xa non seduciría nin a Michael Bay, o director dese despropósito marabilloso titulado Armaggedon. En realidade, parece que o de tentar facer que os asteroides voen polo aire, non foi nunca unha boa idea: “se falamos sobre desviación de asteroides, a xente pensa en Armaggedon, en Bruce Willis e a bomba nuclear. Pero isto non se corresponde coa realidade”, explica Ian Carnelli, director da misión Hera da ESA. “Dos asterioides grandes de máis dun quilómetro coñecemos o 90% e sabemos que ningún deles supón un risco nun futuro próximo. O que nos preocupa máis son os asteroides pequenos que, polo seu tamaño, reflicten menos luz e son máis difíciles de ver desde a Terra. A técnica que mellor funciona para desviar estes asteroides, en teoría, é a do impacto cinético. É como cando xogas ao billar e golpeas unha bóla para desviar outra”. Así que en lugar dw Bruce Willis, parece que a quen necesito en realidade é ao Paul Newman do buscavidas.
A ameaza de que un corpo proveniente do espazo choque contra o noso planeta é real. De feito recentemente soubemos que o 18 de decembro de 2018, un asteoride impactou contra a atmosfera sobre o mar de Bering a 32 quilómetros por segundo. O impacto liberou unha enerxía de 173 quilotóns, o equivalente a dez bombas atómicas como a lanzada sobre Hiroshima. Evitar que se produzan choques que poidan danarnos é o obxectivo dunha idea que están a desenvolver en conxunto a NASA e a ESA. A axencia americana quere lanzar en 2021 a súa misión Dart para ensaiar a técnica de cambio de dirección de asteroides mediante impacto, mentres que a ESA quere contribuír ao proxecto coa misión Hera, que sería a encargada de observar e estudar o impacto causado por Dart.
Rüdiger Jehn, director da oficina de Defensa Planetaria da ESA, explica que na lista de risco figuran un total de 809 obxectos que poderían chocar contra o noso planeta. E, aínda que as perspectivas poderían resultar terroríficas, para quen está afeito ver estes datos a diario a ameaza convértese en estatística: “o 206 QV89 mide 40 metros e podería chocar o 9 de setembro de leste mesmo ano, de 2019. Pero as probabilidades son dunha entre 11.000, así que é unha probabilidade moi reducida”. Un asteoride entre os 100 e os mil metros podería destruír un país enteiro como o noso, explica o español Juan Luís Cano, director de operacións do Centro de Coordinación de Asteroides Próximos á Terra da ESA. Por iso é polo que o mellor investimento que podemos facer é ampliar a rede de telescopios para ter sempre un ollo posto no ceo. E así todos poderemos durmir máis tranquilos…Bruce Willis incluído.
FONTE: José L. Álvarez Cedena/elpaís.com
