vgomez

Inminentemente comenzaremos cunha parte nova dentro das CCNN: A Química. Para esta parte propóñovos unha páxina interactiva que pode ser moi útil, non só para o temario propiamente dito, senón como fonte de información para traballos escolares relacionados cos elementos químicos. Esta páxina é www.ptable.com. Se queres darlle un vistazo e ver as posibilidades que ofrece pincha en Taboa Periódica. Tamén tela permanentemente en ENLACES co mesmo nome.

Hoxe, 1 de decembro, celébrase o Día Internacional contra a SIDA. Cada ano, adícase este día a dar a coñecer os avances contra esta epidemia mundial de SIDA causada por extensión da infección do VIH. Elexíuse este día porque o 1 de decembro foi diagnosticado o primeiro caso, concretamente o 1 de decembro de 1981.

Para loitar a mellor arma é a información. Infórmate!  Aquí podes tela. Preme SIDA

As xemínidas son unha chuvia de meteoros de actividade alta. O seu período de actividade exténdese entre o 7 e o 17 de decembro. O seu máximo ocurre o día 14, sendo unha das chuvias de maior actividade do ano.

2 de decembro: Lúa Chea

9 de decembro: Cuarto Minguante

16 de decembro: Lúa Nova

21 de decembro, ás 18:46, Solsticio de Inverno

24 de decembro: Cuarto crecente

31 de decembro: Lúa Chea

31 de decembro:Eclpise parcial de Lúa

O 25 de outubro de 2006, a NASA lanzou dúas sondas xemelgas a bordo dun foguete Delata II. Eran as STEREO, que teñen por misión ter unha visión do Sol máis completa, dende todos os ángulos, observando as manchas solares, etc.

O pasado mes de febreiro, observouse un "tsunami solar", aínda que o seu nome técnico é "onda magnetohidrodinámica de modo rápido" ou "onda MHD". A nave STEREO víu como a  mancha solar 11012 fixo explosión de maneira inesperada, lanzando ao espazo unha nube de mil millóns de toneladas de gas (un "CME") e enviou un tsunami á superficie do Sol, elevándose a 100.000 quilómetros de altitude e desprazándose a unha velocidade de 250 km/s.

Segundo os expertos estes tsunamis solares non representan riscos para a Terra.

"Temporal" 29/11/2009 . Realizada na zona da EDAR de A Guarda.

Inicio un novo tema FOTOS, nas que plasmarei vivencias persoais, fundamentalmente relacionados coa natureza, paisaxe, cultura, curiosidades, etc.

O telescopio espacial Hubble (que leva 19 anos no espazo a 600 km da codia terrestre) da ESA (Axencia Espacial Europea) e da NASA (Administración Nacional da Aeronáutica e do Espazo), acaba de descubrir unha auténtica fábrica de po estelar. Atópase nunha zona da nebulosa Iris ou NGC 7023 (descuberta polo astrónomo sir William Herschel en 1794, na constelación de Cefeo, aúns 1.400 anos luz da Terra). Esta zona está iluminada pola luz dunha estrela próxima, a HD 200775, semellante a unha gran nube de algodón. O po estelar é un dos ingredientes na formación das estrelas.

O coala ou Koala (Phascolarctos cinereus), é un mamífero marsupial que vive nas árbores dos bosques de eucaliptos (alimentándose das xemas e follas) de Australia. Como característica do seu aspecto destaca o seu corpo rechoncho e unha pelaxe espesa, suave e de cor gris; cabeza grande e redonda, e extremidades curtas.

Como curiosidade deste animal a cantidade de tempo que adica a durmir, ao parecer para aforrar enerxía: entre 20 e 22 horas, superando ao oso perezoso. Por  certo a maior parte destas horas son de día, pois a súa alimentación é, fundamentalmente de noite.

Seguro que cando escoitedes a canción deste videoclip soaravos. É a canción "December song" (moi adecuada para esta época) do cantante inglés George Michael (Londres, 1963). Este cantante, compositor e productor (que non é un  modelo na vida privada a seguir) é un monstruo no apartado musical. O seu verdadeiro nome é Georgios Kyriacos Panayitou (pola ascendencia gregochipriota do seu pai). Comenzou  alá polo 1981 en diferentes bandas, ata que en 1987 seguíu a súa carreira musical en solitario.

O próximo día 14, sae a venda o seu último DVD, que recolle a súa última xira mundial e tamén a nova versión do tema navideno que antes citei é que aparece no vídeo: "December son" (Island Records)

Se queres coñecer toda a súa discografía pincha en Discografía de George Michael

Viñeta sobre a mata do porco de Luis Davila (Faro de Vigo 08/12/2009)

Nesta pasada ponte, moitos porcos ou marraus caeron na tradicional "mata", aínda que o tempo non acompañase moito para estas faenas.

O porco, é un animal mamífero tipicamente doméstico (Sus scrofa domesticus),que é a base da alimentación no rural. Do sabor da carne xa o di o refran: Das aves a perdiz, pero mellor a codorniz,... pero se o porco voara, non había ave que lle gañara.

Codorniz ou paspallás.

No curso pasado no noso centro, ao igual que en moitos máis, tivemos algún que outro problema por colgar imaxes en internet non desexadas. Lamentablemente e con moita facilidade, cada día son máis os rapaces e rapazas que, nas denominadas redes sociais, colgan e intercambian fotografías, fundamentalmente, aínda que tamén comentarios e outros contidos. Hoxe  existen multitude de programas para acceder a eses contidos sen ter que ter o visto e prace do titular, pero na maioría dos casos son os mesmos amigos-as os que poden manimupular esas fotografías ou contidos, pois forman parte do grupo.

Daquela, refírome ao curso pasado, viñeran especialistas da Garda Civil, para alertarnos deses perigos e incluso advertirnos que podiamos caer nalgún delito. Pero seguimos nas mesmas, non somos conscientes no que nos movemos. Internet é algo fantástico, pero tamén é un mundo escuro onde hai xente desamprensiva.

Este vídeo forma parte dunha campaña patrocinada polo Defensor do Menor, Telefónica e a Obra Social Caixa Madrid,  para fomentar a responsabilidade dos adolescentes ao colgar imaxes na rede.

Para a póxima pénsao!

O cabaleiro escarlata ou Scarlet Knight (RU27 nome técnico), é un robot submarino que chegou o pasado día 9 a Baiona.

A súa viaxe escomenzouna o pasado día 27 de abril, recorrendo 7400 km. Este artefacto en forma de torpedo mide 2,4 m e pesa 57 kg. Estivo impulsado pola enerxía das súas baterías e coa axuda das correntes mariñas, emerxendo nalgúns momentos para enviar os datos recollidos por vía satéite.

Ao longo da súa travesía, dende EEUU atravesando o océano Atlántico, foi recollendo datos sobre a salinidade da auga, a súa temperatura e as correntes mariñas, co fin de estudar o seu papel no cambio climático.

O artefacto foi entregado ao reprsentante da Oficiña de Ciencia e Tecnoloxía da Casa Branca. Agora a esperar os resultados!

Colisión das galaxias NGC 6872 e IC 4970 (NASA)

Os telescopios espaciais da NASA (Observatorio Chandra, Tescopio Spitzer e  o Gran Telescopio do Observatorio Europeo Austral) captaron a mimaxe do choque de dúas galaxias, NGC 6872 e IC 4970 (que é máis pequena e está na parte superior da imaxe), que xiran ao redor dun buraco negro (obxecto cuxa forza gravitatoria é tan grande que nin a luz escapa).

A fotografía que vedes arriba, conseguíuse coa xustaposición das imaxes transmitidas polos citados observatorios.

Na próxima semana estréase a última película do director James Cameron (que xa dirixira outras películas coñecidas como The Terminator, Titanic, The Abyss, etc): AVATAR.

Cunha duración de 156 minutos e cun presuposto de 500 millóns de dólares, a película conta a historia dun veterano de guerra, ferido en combate, que queda parapléxico. Seleccionado para o programa avatar (que lle permitiria volver camiñar) é transladado a unha lúa, chamada Pandora, dun paneta recentemente descuberto chamado Polythemis. Pandora está habitada polos Na’vi, unha raza humanoide coa súa propia lingua e cultura, coa que  a raza humana se atopa en guerra. Os humanos queren ese lugar pois alberga grandes riquezas, tesouros e recursos, polo  que a mente do protagonista e doutros soldados é transladada aos corpos  duns Na´vi creados xenéticamente (avatares) para aís poder infiltrarse nas liñas enimigas. Co tempo o protagonista, que se chama Jake, namórase dunha femia Na´vis, Neytiri, sendo aceptado no clan, tendo que tomar partido na guerra épica entre os humanos e Na´vi, que decidirá o futuro do mundo enteiro. 

En resumo, unha aventura épica creada cunha nova xeración de efectos especiais que nos leva a un espectacular novo mundo máis alá da nosa imaxinación. 

Que disfrutedes dela!

Aínda que non é novo, en datas previas a reunión que se está a celebrar en Copenhague con motivo da Conferencia sobre o Cambio Climático da ONU 2009, sucedeu un feito desestabilizador para a propia cumbre e para todo o relacionado co cambio climático: O Climategate.

Este é o nome dun incidente de piratería de e-mail á CRU (Climatic Research Unit) da Universidade de East Anglia (Inglaterra) alá polo mes de novembro, cando un dos servidores foi ataco por hackers. Un inividuo roubou e de forma anónima difundíu a traves de correos electrónicos arquivos condidenciais que contiñan conversas, datos e opinións sobre o quentamento global. Primeiro na rede e despois nos medios de comunicación, a pelota foi aumentando de tamaño.

Coma sempre, a río revolto... Os escépticos do cambio climático (nos que poderiamos incluír a título de broma, aquel "primo" de Mariano Rajoy) denunciaron que había unha manipulación dos datos a favor a denominada teoría do cambio climático antropogenético (que considera os efectos producidos pola actividade humana sobre o clima da Terra).

En total, que vaia lío para poñer en cuestión algo evidente: o home, en grande medida, é o causante de moitos males, incluído o cambio do clima, que acontecen no noso planeta. Esperemos que en Copenhague tomen o asunto en serio e que deixen a un lado "chismes" que o único que fan e retardar as solución. Igual ere retardo pode ser determinante e fatal para todos.

Volcan Mayón (Filipinas) / AP

Mayón é o nome dun volcan que acaba de entrar en erupción e que é considerado como un dos volcáns con cono máis perfecto. Está situado en Filipinas, concretamente na provincia de Albay, na rexión de Bicol, a 300 km de Manila. É o volcan máis activo do país, con 50 erupcións nos últimos 400 anos. A máis destructiva foi no ano 1814, provocando 1.200 mortes. Levaba inactivo dende 2006.

As autoridades filipinas iniciaron a evacuación dunhas 50.00 persoas, despois que comenzara o volcan a lanzar rochas e lodo ardente. Atópase en alerta 3, non descartando que en próximos días se pase a 4 ou 5 (erupción en progreso).

Ás 14:36 horas de hoxe recibín o seguinte correo electrónico, procedente da Consellería de Educación e Ordenación Universitaria:

SANTIAGO DE COMPOSTELA, 15 decembro 2009


A Consellería de Educación e Ordenación Universitaria decidiu, como medida de precaución, a suspensión das clases en todos os centros educativos de Galicia durante a xornada de mañá, 16 de decembro.

Esta medida tómase en base á predición, feita pola Axencia Estatal de Meteoroloxía (AEMET), dun fenómeno meteorolóxico adverso con precipitacións  en forma de neve que afectarán á Comunidade Autónoma de Galicia en cotas baixas a partir das 00.00 horas oficial do mércores 16 de decembro.

Consellería de Educación e Ordenación Universitaria

Hoxe estréase en Madrid e Barcelona (esperemos que pronto chegue a Galicia) o documental "Delfines y ballenas 3D: Tribus del océano" de Jean-Jacques Mantello.

Presentada por Jean-Michel Cousteau e narrada por Daryl Hannah, a película-documental lévanos a unha viaxe polo fondo do mar, onde viven unha grande variedade de peixes e mamíferos. Cunha duración de 42 minutos, pásase revista a máis de 11 variedades destas especies cetáceas con detalle. A película é o resultado de 3 anos de traballo, 12 expedicións internacionais, 600 horas baixo o océano.

Segundo palabras do director " O noso obxectivo é mostrar a beleza do océano para que a xente tome  conciencia da importancia de protexelo"

Temos unha cita con esta película-documental que non debemos deixar pasar.

Se queres coñecer máis sobre os protagonistas da película (golfiños e baleas) pincha en GOLFIÑOS E BALEAS:GUÍA DIDÁCTICA

    Último terremoto   (Instituto Xeográfico Nacional)

Un terremoto, que se notou sobre as 2:27 horas, con epicentro na costa atlántica de Portugal (a 58 km de profundidade) e a uns 100 km ao sur do Cabo de San Vicente, acadou unha magnitude de 6,2 graos na escala de Richter (tamén coñecida como escala de magnitude local (M_L), que é unha escala logarítmica arbitraria que asigna  un número para cuantificar o efecto do terremoto. Chámase así na honra do sismólogo americano Charles Richter /1900-1985/)

Aínda que se sentíu con forza na costa andaluza, tamén houbo persoas que o notaron por uns instantes na nosa comunidade. Parece ser que non houbo danos.

O maior terremoto que púido ser medido foi o da cidade de Valdivia (Chile) no ano 1960, que acadou 9,6 graos.

Chi Cygni (HD 187796 / HR 7564) é unha estrela variable da constelación Cygnus (cisne) que se atopa aproximadamente a uns 500 anos luz da Terra.

A noticia radica en que esta estrela é xemelga do noso Sol e que segundo publica "The Astrophysical Journal" na edición de decembro, despois de ser fotografada, puidose recrear o que seguranmente lle acontecerá ao noso astro rei: a súa morte.

Chi Cygni estase a inchar ata convertirse nunha xigante vermella dun tamaño capaz de engulir calqueira planeta a unha distancia como a que separa o Sol de Marte do noso sistema. Así mesmo, empezou a emitir pulsacións (1 vez cada 408 días), latindo como se se tratase dun corazón xigante.

Este estudo, no que se recurríu ao observatorio IOTA do Smithsonian Institution, situado no Monte Hopkins (Arizona), permitira coñecer o que lle acontecerá ao noso Sol nese momento fatídico.

Recreación de "Ardi" (Science)

A revista "Science" fai un balance dos maiores descubrimentos do ano que está a piques de rematar. O maior descubrimento é o achádego de "Ardi" (Ardipithecus ramidus), un homínido que vivíu en África (Etiopía) hai 4,4, millóns de anos. As súas características eran: femia, bípeda, uns 50 kg e 1,20 m de altura. Brazos longos e dedos curvados para moverse polas ramas das árbores e cun cerebro que tiña unha capacidade de 300 cm³ (o humano moderno ten 1.500 cm³). Se queres profundizar nesta noticia pincha en AQUÍ

Outros acontecementos cientificos importantes do ano 2009 son, para esta revista: a identificación de pulsares (estrelas moi magnéticas e rápidas), o descubrimento da rapamicina, que alonga a vida, de momento nos ratos; o primeiro láser de raios X; a terapia xenética para tratar unha grave doenza cerebral; o achádego de vayor de auga e xeo no polo sur da Lúa; ou a reparación do telescopio espacial Hubble.

Hoxe, luns 21, ás 18 horas e 47 minutos entra oficilamente o inverno no hemisferio norte (no que España se atopa). Esta estación durará ata o 20 de marzo de 2010 (88 días e 23 horas). No hemisferio sur comenza o verán.

Esta estación sucede no denominado solsticio de inverno (sol quieto), posición do punto da eclíptica no que o Sol acada a súa posición austral, acadando a a súa máxima declinación Sur (-23º 27´) e segue así case sen moverse varios días (sol quieto).

A Fundación Institucional Española (FIES) convoca o concurso ¿Que és un Rey para ti?

Neste concurso podedes participar, entre outros, os alumnos-as de 1º e 2º de ESO. Os traballos serán individuais e poderán presentarse en calquera formato, sempre e cando as dimensións non superen un tamaño de 60X60cm, cun peso non superior a 5 quilos.

O tema do traballo será a figura da S.M. El Rei e/ou o papel da Coroa en España.

Os traballos enviaranse  a FIES- Gran Vía, 16-4º Esquerda 28013 MADRID. O prazo remata o 15 de febreiro de 2010.

Se estás interesado consulta as bases pinchando en BASES EN GALEGO

Unha vez ía andando o lobo por un camiño, e estaba un grilo cantando na beira do burato. O lobo puxo un pé no burato. O grilo díxolle:

- Escapa de aí, ou seica non me ves?

O lobo miraba e miraba e non vía nada. E volveu dicirlle ao grilo:

- Escapa de aí, que che vou pegar unha patada.

O lobo andivo un pouco para adiante e entón víuno. Como o grilo díxeralle que lle ía pegar unha patada, díxolle:

- Bueno, xa que te fas tan valente, calquera día imos ter unha liorta!

O grilo díxolle que si. O lobo buscou toda clase de feras e o grilo buscou avespas, avellas e abesouros.

Chegando o zorro diante, como era o máis listo, achegándose onda o grilo, e díxole:

- Ariba, grilo!

O grilo saíu moi contento, e vai o zorro e déulle co rabo e tirouno patas arriba. O grilo dixo:

- Saian as do cu marelo!

E pegan as avespas co zorro. Este dicía entón:

- Al río, al río, que la gente viene con brío!

Por fin chegaron as VACACIÓNS. Despois dun duro trimestre chegou a hora de descansar. Será ata o día 11 de xaneiro de 2010 (luns), no ano próximo.

Desexo que os resultados académico acompañasen. Espero que cargemos pilas para escomenzar, con gañas, o segundo trimestre, moi importante no curso.

Dende aquí deséxovos os mellores desexos para que pasedes un BO NADAL E PRÓSPERO ANO 2010.

Un saúdo para todos.

VÍCTOR

Hai uns días falláronse os premios Foto-Nikón 2009, na que participaron ao redor de 400 fotógrafos, a maioría profesionais, e cun total de 1.200 fotos a concurso. Estes premios teñen tres categorías: Natureza, Deporte e Xente e Sociedade.

Os gañadores foron Jodi Blas (coa foto que vedes arriba e que pertence á categoría de Natureza), Manuel Fernández e Sofía Moro.

Parabéns!

Repetitivamente sucede, desta vez nas costas de  Nova Zelandia (imaxe  da instantánea  de Ursula Walsh da Axencia EFE). Un total de 126 baleas morreron varadas durante esta fin de semana, a pesar dos esfozos de voluntarios por volvelas ao mar.

Os científicos seguen sen saber a razón pola que estes cetáceos morren deste xeito e albiscan que pode ser por ser atraídas polos soares dos  grandes barcos ou que seguen a un lider desorientado e enfermo.

Seguro que o home está por medio!

Nesta viñeta de O Carrabouxo (Xosé Lois) publicada no xornal La Región (26/12/09) mostránse as simpatías por dous dos grandes do tenis: Nadal e Federer. Eso si, o de Nadal é moi común nos saúdos nestas datas. É coincidencia!

Esta viñeta de Luis Davila (Faro de Vigo 28/12/09) céntrase no fracaso do último Cumio sobre o Clima celebrado en Copenhage. Fracaso sen paliativos, pois o único que se conseguíu foi un acordo de mínimos, comprometéndose a completar o traballo para  poder chegar a un novo pacto global en novembro de 2010 en México.

Non puido pasar nada peor, despois de dúas semanas de Cumio: unha patada á pelota e que rode ata o próximo ano. Agora, cada país é libre de adoptar ou non ese acordo sobre obxectivos de protección climática.

Seguen sen tomarse en serio o futuro do noso planeta. Cando queiran pór remedio será moi tarde. Como se conclúe na viñeta: foi unha inocentada ás esperanzas postas nese Cumio!

Hoxe remata o ano e con el tamén o Ano Internacional da Astronomía. Quixera adicarlle este último NOME PROPIO  a esta astrónoma: Williamina Paton Stevens Fleming.

Nacida en Dundee-Escocia en 1857, exerceu alí como mestra ata que se trasladou co seu home a EEUU, en 1878. Estando embarazada, foi abandoada polo seu marido véndose obrigada a traballar de criada do director do Observatorio de Harvard. Pouco tempo despois, xa se encargaba de revisar coidadosamente as placas fotográficas do ceo, algunhas de moi mala calidade, obtendo resultados tan importantes como o descubrimento da nebulosa "Cabeza do cabalo". Contribuíu a confección do catálogo Henry Draper. Descubríu 59 nebulosas, 310 estrelas variables e 10 novas.

Acabou sendo nomeada conservadora do arquivo fotográfico, o primeiro cargo instuticional de Harvard en mans dunha muller. Morreu en Boston-Massachusetts en 1911.

O goberno galego acaba de facer público o documento "Bases para a elaboración do decreto de plurilingüismo no ensino non universitario de Galicia", iniciando agora unha fase de consulta e que entrará en vigor en todo o ensino non universitaria a partir do próximo curso.

Salvo modificacións, a partir do próximo curso os pais elixirán cada ano, mediante a preinscrición de matrícula, o idioma no que queren escolarizar aos seus fillos na etapa de infantil, en función de cal sexa a lingua materna. Esta decisión será vinculante e utilizarase o idioma que salga por maioría. En primaria, secundaria e bacharelato o borrador establece que se impartirá un terzo das horas lectivas en castelán, outro terzo en galego e outro en inglés, preferentemente. Unha das principais novidades é que os pais decidirán ata en que lingua daranse algunhas materias. En concreto, a súa decisión será vinculante en Coñecemento do Medio e en Matemáticas . Cada catro anos farase unha consulta entre os proxenitores na que se decidirá cal delas dar en castelán e cal en galego (en primaria), ou ata se queren as dúas en galego ou as dúas en castelán (en secundaria).

Como vedes moitas novidades que merece a pena ler polo miúdo, por eso  podes facelo pinchando en BASES PARA A ELABORACIÓN DO DECRETO DO PLURILINGÜISMO NO ENSINO NON UNIVERSITARIO DE GALICIA  

Queda moito ata que saia o decreto, haberá un gran debate e seguro que opinións contrapostas. Humildemente penso que é interasante a potenciación das linguas estranxeiras, pero vexo que a nosa lingua, o galego, sae prexudicada. Cando a política mete os fuciños no campo da educación con maiúsculas estraga todo. Alá quedan aqueles tempos de grandes acordos (de todos os partidos de Galicia) onde tiña unha paridade do 50% con respecto ao outro idioma oficial, o castelán.

Vermos en que remata esto!